Beth allwn ac na allwn roi cymorth yn ei gylch
Beth allwn ni ymchwilio iddo
Mae gennym gyfrifoldeb cyfreithiol i edrych ar bryderon:
- os yw ymddygiad osteopath islaw’r safonau a nodir yn ein Safonau Ymarfer Osteopathig
- os yw osteopath yn euog o anghymhwysedd proffesiynol oherwydd bod ei waith yn methu â bodloni’r safonau rydym ni’n eu gosod yn ein Safonau Ymarfer Osteopathig
- os yw osteopath yn euog o drosedd – os bydd hyn yn digwydd, byddwn yn edrych ar yr euogfarn i benderfynu a yw’n effeithio ar allu’r osteopath i ymarfer
- os yw cyflwr corfforol neu feddyliol osteopath yn effeithio’n ddifrifol ar ei waith – os oes gan osteopath broblem iechyd, byddwn yn ystyried sut mae’n effeithio ar ei allu i ymarfer.
Yr hyn na allwn ymchwilio iddo
Mae ein meini prawf trothwy ar gyfer ymddygiad proffesiynol annerbyniol yn esbonio’r mathau o bryderon na allwn ymchwilio iddynt, gan gynnwys (ond heb fod yn gyfyngedig i) y canlynol:
- Pryderon am ffioedd neu gostau triniaeth
- Pryderon a wneir yn ddienw na ellir eu cadarnhau gan eraill
- Pryderon sy’n ymwneud ag anghydfodau cyflogaeth
- Pryderon sy’n ymwneud ag anghydfodau contractiol gan gynnwys trefniadau ar gyfer prydlesu safle a chyfleusterau
- Pryderon am fywyd personol osteopath (er enghraifft, rhai sy’n gysylltiedig ag achos ysgariad) oni bai bod y pryderon yn ymwneud ag ymddygiad sy’n gamdriniol, yn dreisgar neu a allai effeithio’n negyddol ar enw da’r proffesiwn
- Pryderon nad oes ganddynt oblygiadau o ran diogelu’r cyhoedd
Meini Prawf Trothwy ar gyfer Ymddygiad Proffesiynol Annerbyniol
Cymeradwywyd gan y Cyngor ar 4 Chwefror 2015
- Pwrpas y ddogfen hon yw rhoi arweiniad i achwynwyr a chofrestrwyr, ac i Bwyllgor Sgrinwyr ac Ymchwilio’r Cyngor Osteopathig Cyffredinol (GOsC), ynghylch y mathau o faterion a gaiff eu hystyried o dan weithdrefnau addasrwydd i ymarfer y GOsC.
- Yn unol â’i amcan cyffredinol1, nod gweithdrefnau addasrwydd i ymarfer y GOsC yw diogelu’r cyhoedd. Ni fwriedir iddynt fod yn broses gyffredinol i ddatrys cwynion, nac i ddatrys anghydfodau sifil rhwng cofrestreion a chleifion.
- Mae ymchwilio i honiadau yn drylwyr yn broses sy’n defnyddio llawer o adnoddau. Mae budd y cyhoedd yn ei gwneud hi’n ofynnol i adnoddau o’r fath gael eu defnyddio’n effeithiol i ddiogelu’r cyhoedd ac ni ddylid eu dargyfeirio i ymchwilio i faterion nad ydynt yn peri pryder.
- Mae’r GOsC o’r farn bod y dull hwn yn ymateb cymesur i nifer y cwynion y mae’n eu derbyn, ac mae’n gyson â’r egwyddor o ‘reoleiddio priodol’ a hyrwyddir gan yr Awdurdod Safonau Proffesiynol.
- Mae’r GOsC, mewn ymgynghoriad â’i randdeiliaid, gan gynnwys cynrychiolwyr y cyhoedd a chleifion, wedi llunio’r ‘meini prawf trothwy’ hyn.
- Bydd y meini prawf hyn yn arwain y Sgrinwyr wrth benderfynu a roddir pŵer gan Ddeddf 1993 i ymdrin â chwyn os gwelir bod rheswm da drosti2, a byddant yn arwain y Pwyllgor Ymchwilio wrth benderfynu a oes ‘achos i’w ateb’ ai peidio.
- Dywed Deddf Osteopathiaid 1993 mai ‘Ymddygiad Proffesiynol Annerbyniol’ yw ‘ymddygiad nad yw’n cyrraedd y safon sy’n ofynnol gan osteopath cofrestredig’.
- Mae’n dweud hefyd y dylid ystyried methiant i gydymffurfio ag unrhyw ddarpariaeth yn y Cod Ymarfer ond ni fydd, ynddo’i hun, yn gyfystyr ag Ymddygiad Proffesiynol Annerbyniol.
- Cafodd y trothwy ar gyfer a yw cwyn neu honiad yn gallu bod yn gyfystyr ag Ymddygiad Proffesiynol Annerbyniol ei bennu gan yr Uchel Lys yn achos Spencer v y Cyngor Osteopathig Cyffredinol:1
- A yw’r honiad yn deilwng o’r gwarth moesol a’r cyhoeddusrwydd sy’n deillio o ganfyddiad o ymddygiad proffesiynol annerbyniol?
- Gan gymhwyso’r trothwy hwn, mae materion nad ydyn nhw’n gallu bod yn gyfystyr ag Ymddygiad Proffesiynol Annerbyniol fel arfer, ac felly nad ydynt yn cael eu cyfeirio at y Pwyllgor Ymddygiad Proffesiynol gan amlaf, yn cynnwys:
| Cwynion am gymryd nodiadau a chadw cofnodion yn unig | Yn absenoldeb y canlynol: i. ‘ anghymhwystra neu esgeulustod lefel uchel’; neu ii. tystiolaeth o fethiant i gydymffurfio â deddfwriaeth llywodraethu gwybodaeth berthnasol megis Deddf Diogelu Data 1998 (ac unrhyw ddeddfwriaeth ddilynol neu ddiwygio) |
| Cwynion nad ydynt yn dod o fewn rhesymau statudol adran 20 o Ddeddf Osteopathiaid 1993 | |
| Cwynion blinderus, gan gynnwys lle mae’r achwynydd: i. yn methu dro ar ôl tro â nodi’r union faterion y mae ef neu hi am gwyno amdanyn nhw; ii. yn newid sylwedd y gŵyn yn aml neu’n ceisio codi materion newydd yn barhaus; neu iii. yn ymddangos ei fod wedi cyflwyno’r gŵyn i gythruddo neu darfu ar y cofrestrydd, a dim rheswm arall | |
| Cwynion sydd wedi’u gwneud yn ddienw ac na ellir eu gwirio fel arall | |
| Cwynion lle mae’r achwynydd yn gwrthod cymryd rhan a darparu tystiolaeth a lle na ellir gwirio neu brofi’r honiad fel arall | |
| Cwynion sy’n ymwneud ag anghydfodau rhwng cofrestreion a chleifion ynghylch ffioedd neu gostau triniaeth | Ar yr amod nad oes honiad o anonestrwydd neu fwriad i dwyllo |
| Cwynion sy’n: i. ceisio ailagor materion sydd wedi bod yn destun proses tribiwnlys cyflogaeth neu achos sifil eisoes; ii. ceisio rhagdybio neu ddylanwadu ar ganlyniad achosion rheoleiddiol neu sifil eraill; neu iii. yn perthyn yn fwy priodol o fewn awdurdodaeth rheoleiddiwr arall (e.e. yr Awdurdod Safonau Hysbysebu) a dylent fod wedi’u gwneud i’r rheoleiddiwr hwnnw | |
| Cwynion sy’n gyfystyr â gwahaniaeth barn broffesiynol | Ar yr amod bod y farn: i. yn cael ei derbyn fel barn briodol a chyfrifol gan gorff cyfrifol o osteopathiaid sy’n fedrus yn y maes ymarfer penodol hwnnw ac sy’n gweithredu’n gyfrifol; ac ii. yn cael ei dal yn rhesymol ac yn gallu gwrthsefyll dadansoddiad rhesymegol |
| Cwynion sy’n ymwneud ag anghydfodau cyflogaeth | |
| Cwynion sy’n ymwneud ag anghydfodau cytundebol, gan gynnwys trefniadau ar gyfer prydlesu eiddo a chyfleusterau | |
| Cwynion sy’n ymwneud ag anghydfodau busnes, gan gynnwys: i. defnyddio enwau parth gwe neu enwau masnachu neu rai sy’n swnio’n debyg; ii. ‘dwyn cleifion’; a iii. materion sy’n deillio o chwalu perthynas pennaeth/cyswllt | Ar yr amod nad oes honiad o dorri cyfrinachedd cleifion neu faterion diogelu data |
| Cwynion am fywyd personol unigolyn cofrestredig (gan gynnwys materion sy’n codi o achos ysgariad) | Oni bai bod y gŵyn yn ymwneud ag ymddygiad neu drais camdriniol, neu ymddygiad sy’n dwyn anfri ar y proffesiwn |
| Cwynion heb unrhyw oblygiadau diogelu’r cyhoedd ond sy’n cael eu gwneud am ddim rheswm heblaw bod yr achwynydd yn ymwybodol bod y parti arall i anghydfod yn unigolyn cofrestredig (e.e. anghydfodau am ffiniau rhwng cymdogion) | |
| Y troseddau gyrru canlynol: i. torri hysbysiadau parcio a hysbysiadau tâl cosb; a ii. cosb benodedig (a chosb benodedig: cynnig amodol) am droseddau moduro | Ar yr amod nad yw cyffuriau neu alcohol yn gysylltiedig â’r drosedd ac nad oes unrhyw broblemau iechyd posibl mewn perthynas â’r unigolyn cofrestredig |
| Cosb o dan gynllun tocyn cosb trafnidiaeth gyhoeddus |