Beth rydym ni’n ei wneud (a ddim yn ei wneud)
Ein rôl ni yw diogelu iechyd, diogelwch a lles y cyhoedd, a diogelu enw da’r proffesiwn osteopathig. Rydym yn gyfrifol am sicrhau bod y cyhoedd yn parhau i fod â hyder yn y proffesiwn osteopatheg, ac rydym yn gyfrifol am y safonau proffesiynol y mae’n rhaid i osteopathiaid a myfyrwyr osteopathig eu dilyn er mwyn ymarfer yn ddiogel.
Yn gyfreithiol, allwn ni ddim hyrwyddo osteopatheg i’r cyhoedd neu weithwyr gofal iechyd proffesiynol eraill. Allwn ni ddim chwaith lobïo’r llywodraeth ar ran y proffesiwn osteopathig.
Beth rydym ni’n ei wneud
- Cadw Cofrestr o bawb sy’n cael ymarfer osteopathi yn y DU.
- Gweithio gyda’r cyhoedd, cleifion a’r proffesiwn osteopathig i benderfynu ar safonau ansawdd uchel o ymarfer ac ymddygiad osteopathig, a’u cynnal a’u datblygu.
- Helpu cleifion gydag unrhyw bryderon maen nhw’n eu codi am osteopath a bod â’r grym i dynnu unrhyw osteopathiaid o’r Gofrestr, nad ydynt yn bodloni’r safonau proffesiynol ac nad ydynt yn addas i ymarfer.
- Gwirio ansawdd addysg osteopathig a phenderfynu ar y safonau ymarfer y mae’n rhaid i fyfyrwyr osteopathig eu dangos cyn iddynt raddio.
- Diogelu’r teitl osteopathig rhag cael ei gamddefnyddio trwy sicrhau mai dim ond y rheini sydd â’r cymwysterau cywir a chofrestriad dilys a chyfredol sy’n gallu galw eu hunain yn osteopath.
- Gwneud yn siŵr bod osteopathiaid yn cynnal gweithgareddau i gefnogi eu Datblygiad Proffesiynol Parhaus (DPP).
Meysydd ein gwaith a sut rydym yn rheoleiddio’r proffesiwn osteopatheg
Gallwch fod yn hyderus mai dim ond graddedigion sydd wedi bodloni’r safonau rydym wedi’u gosod trwy gydol eu hyfforddiant sy’n cael ymuno â’r Gofrestr ac ymuno â’r proffesiwn osteopatheg.
Mae hyn oherwydd ein bod yn gosod ac yn cynnal safonau ar gyfer addysg a hyfforddiant osteopathig. Rydym hefyd yn cydweithio â darparwyr addysg osteopathig i sicrhau eu bod yn darparu addysg a hyfforddiant o ansawdd uchel, a gofal osteopathig diogel o ansawdd da i gleifion.
Darllenwch fwy am sut rydym yn gosod y safonau ar gyfer addysg a hyfforddiant
Mae pryderon am osteopathiaid yn parhau i fod yn isel, gyda llai na 2% o siawns y bydd claf yn codi pryder. Fodd bynnag, ar yr achlysur prin pan fydd pethau’n mynd o’i le i gleifion neu pan fo ganddynt bryderon am ymddygiad osteopath, gallant gysylltu â’r GOsC gan wybod mai ein rôl ni yw ymchwilio i’w pryderon a sicrhau bod yr osteopath yn addas i ymarfer. Mae hyn yn golygu ein bod yn cadw cleifion yn ddiogel trwy sicrhau mai dim ond osteopathiaid sy’n darparu gofal diogel o ansawdd uchel sy’n cael ymarfer yn gyfreithlon yn y DU.
Darllenwch fwy am ein prosesau Addasrwydd i Ymarfer
Gallwn weithredu pan fydd rhywun nad yw ar Gofrestr y GOsC yn defnyddio’r teitl ‘osteopath’ oherwydd ei fod wedi’i warchod gan y gyfraith. Gallwn erlyn unigolion sy’n ymarfer fel osteopathiaid pan nad ydyn nhw ar Gofrestr y GOsC, ac rydym yn gwneud hynny
Dysgu mwy am ein gwaith i ddiogelu’r teitl osteopathig
Trwy ddilyn ein safonau ymddygiad a moeseg, y Safonau Ymarfer Osteopathig, mae osteopathiaid yn gallu dangos i’r cyhoedd eu bod yn bodloni’r safonau proffesiynol uchaf, ac felly’n gymwys, wedi cymhwyso ac yn gallu ymarfer yn ddiogel.
Mae datblygiad proffesiynol parhaus (DPP) yn ofyniad i’r rhai sydd am fod ar ein Cofrestr o osteopathiaid. Trwy ddiweddaru eu sgiliau a’u gwybodaeth, mae osteopathiaid yn dangos eu bod yn gallu ymarfer yn ddiogel ac yn effeithiol yn eu proffesiwn. Mae cynnal gweithgareddau DPP sy’n cefnogi ac ehangu eu meysydd arbenigedd yn helpu osteopathiaid i ddarparu gofal parhaus o ansawdd uchel i gleifion, gan eu cadw’n ddiogel.