Mae osteopathi yn system o ddiagnosis a thriniaeth ar gyfer ystod eang o gyflyrau meddygol. Mae’n canolbwyntio ar integreiddio’r system gyhyrysgerbydol â systemau eraill y corff a’r dylanwad y mae amhariad ar swyddogaeth un ohonynt yn ei gael ar y lleill. Mae hefyd yn ceisio grymuso cleifion wrth eu cynorthwyo i wella a dychwelyd i iechyd da.

Mae osteopathiaid yn defnyddio cyffwrdd, triniaeth gorfforol, ymestyn a thylino i gynyddu symudedd cymalau, lleddfu tensiwn cyhyrau, gwella’r cyflenwad gwaed a nerfau i feinweoedd, a helpu mecanweithiau iachâd eich corff eich hun. Maen nhw hefyd yn darparu cyngor ar osgo, ffordd o fyw ac ymarfer corff i gynorthwyo adferiad, hyrwyddo iechyd ac atal symptomau rhag dod yn ôl.

Yn ôl y gyfraith, rhaid i bob osteopath sy’n ymarfer yn y DU fod wedi’i gofrestru gyda’r Cyngor Osteopathig Cyffredinol, a gall y GOsC ddarparu manylion am osteopathiaid yn eich ardal. Gallwch chwilio’r Gofrestr i wirio bod osteopath wedi’i gofrestru.

Pa gyflyrau y gellir eu trin?

Mae cyflyrau sy’n cael eu trin yn gyffredin yn cynnwys poen yn y cymalau gan gynnwys poen cefn, gwddf ac ysgwydd, poenau ysgwydd a phenelin, cur pen, niwralgia, seiatica, poen sy’n gysylltiedig ag arthritis, anafiadau chwaraeon, a materion eraill fel ffibromyalgia, rhai problemau treulio a phroblemau cylchrediad (fasgwlar).